ԿԱՐՃԱՏԵՍՈՒԹՅՈՒՆ

Հայտնի և անհայտ

ճակատամարտերում-ճամփաբաժաններում

կոփված

ու զզված հայեցողությամբ

ներծծված որևէ կրոնով

կամ քաղաքական հոսանքով

ուղեղների հռնդյունից

ճնշվող-ճմլվող

բայց արհամարող

պետական-կոօպերատիվ-ու-գողական

չտեսնված-չլսված-ու-ոչ-պետքական

փշաքաղված-թե-ճառագայթված

թեփոտ-կամ-զարմացած

թափված կամ վարակված

որ առատ է ուռուցքներով

հենց այնպես

արևածագից մինչև մայրամուտ

իբր կանոնավորված-կատարյալ

բայց դատարկ

սակայն համառ

ոչինչ չասող

չվերջացող

որ քիչ է մնում կարոտես

գերեզմանափոսում ճկված դագաղի երկարությամբ մեկնված

հարազատ մարմինդ

որ միշտ եղել է քեզ հետ

քեզ մոտ

քո կողքին

քեզ համար

ու քեզանից անկախ

հագուստներիդ պես

ուտել-սնվելու պես

դժոխքի հարմարություններին հլու

պատրաստ

ու կոփված

հայեցողությամբ

ու այդպես լիքը

ու այդպես դատարկ

սեփական վանդակից ոչ հեռու

կամ մեջը

որ ոչ ոք չանհանգստացնի

կամ չխոցի-չսպանի ակամա

առօրյա սովորությունների ազդեցությամբ

բայց որքան էլ անկիրք-դժվարընթեռնելի

տխուր է

կատաղեցնող

հիստերիկության աստիճանի

սեփական չնչինությունը համեմատելով

տիեզերքի գերհզոր չնչինության հետ

ակնոց դնելու փոխարեն

ուղղակի

չես դնում

և վերջ