1. Տոլմա կաղամբով
Կաղամբի կոթը դանակով զգուշությամբ հանել այնպես, որպեսզի թերթերը չվնասվեն: Վերջիններս առանձնացնել իրարից և թեթևակի աղաջրում խաշել (պետք է ուղղակի մտցնել եռացող ջրի մեջ ու հանել, որպեսզի կաղամբը չփափկի): Խաշելուց հետո լվանալ սառը ջրով:
ԼՑՈՆ։ 1 կգ տավարի կամ ոչխարի ճարպոտ միսը 4-5 գլուխ սոխի հետ աղալ, ավելացնել 0,5 կապ խառը կանաչի (ձմռանը՝ չորացրած), 0,5 թեյի բաժակ բրինձ, աղացած կարմիր պղպեղ, 0,5 թեյի բաժակ գոլ ջուր, որ տոլման հյութալի լինի: Եթե միսը ճարպոտ չէ, պետք է յուղ կամ կարագ ավելացնել: Հետո կաղամբի տերևներով փաթաթել, դասավորել կաթսայի մեջ, վրան ծածկել ոչ խոր ափսեով, 2 լիքը ճաշի գդալ տոմատի մածուկը ջրով բացել, լցնել տոլմայի վրա, ավելացնել այնքան տաք ջուր, որ տոլման ծածկվի (որպեսզի եփվելուց հետո հյութ լինի, այլապես տոլման չոր կլինի), ծածկել կափարիչով ու եփել:
Հիշեք՝ որքան յուղոտ լինի տոլման, այնքան համեղ կլինի:
2. Տոլմա խաղողի տերևով
Պատրաստվում է նույն ձևով, ինչպես կաղամբով տոլման: Խաղողի տերևները նույնպես պետք է խաշել, հետո օգտագործել: Եփելուց առաջ անհրաժեշտ է տոլմայի վրա այնքան տաք ջուր լցնել, որ ամբողջ զանգվածը ծածկվի և հեշտությամբ քափը քաշվի, այլապես այն կկպչի տոլմային՝ տհաճ տեսք տալով նրան:
Խաղողի տերևով տոլմայի միսը շատ ավելի ճարպոտ պետք է լինի, որպեսզի համեղ ստացվի:
Փաթաթելու ժամանակ լցոնը պետք է դնել տերևի հակառակ կողմի վրա:
3. Տոլմա չփաթաթած
Եթե ուզում եք տոլմա պատրաստել, բայց կաղամբ կամ խաղողի տերև չունեք, մի հուսահատվեք: Դուք կարող եք ստանալ միանգամայն համեղ ճաշատեսակ, դրա համար պետք է եռացող ջրի մեջ (1 լիտր) 1-2 ճաշի գդալ տոմատի մածուկ բացել, տոլմայի լցոնից գնդիկներ պատրաստել և այդ ջրով եփել: Միայն լցոնի մեջ պետք չէ ջուր լցնել, իսկ կաթսայի մեջ այնքան, որպեսզի եփվելուց հետո հյութ մնա: Դա կախված է ձեր ունեցած մսի քանակից:
Լցոնի մեջ պետք չէ տոմատ կամ լոլիկ լցնել, քանի որ խաղողի տերևը թթվություն ունի: