Վերջերս մամուլի մէջ կը տարածուին լուրեր, ըստ որոնց Հայաստանի Ազատագրութեան Հայ Գաղտնի Բանակի հերոս՝ նահատակ Լեւոն Էքմէքճեանի հարազատները դիմած են Թուրքիոյ իշխանութեանց, որ թոյլատրուի ֆրանսա փոխադրել Անգարայի մէջ կախաղան հանուած Լեւոնին աճիւնը:
Անգարայի Էսէնպողա օդանաւակայանի վրայ յարձակման եւ գրաւման ԱՍԱԼԱ-ի Պատմական Կարին Գործողութեան (07.08.1982) ընթացքին, Խրիմեան Հայրիկ Անձնասպանական Քոմանտոյի հերոսներէն Զոհրապ Սարգիսեանը (Մուսթաֆա) նահատակուած եւ Լեւոն Էքմէքճեանը (Ռաշիտ) ծանրօրէն վիրաւորուելով ձերբակալուած էր:
Թրքական զինուորական Խունթան շուտափոյթ դատավարութիւն մը սարքելով՝ հերոս Լեւոն Էքմէքճեանը դատապարտած էր մահապատժի եւ զինք կախաղան հանած (29.01.1983) տխրահռչակ Մամաք բանտին մէջ:
Հերոս Լեւոն Էքմէքճեանը՝ հայ նոր պատմութեան մէջ կախաղան բարձրացած առաջին հայը, որ միաժամանակ Թուրքիոյ տարածքին մահապատժի ենթարկուած վերջին քաղաքական բանտարկեալն է, այսօր պարծանքն է ո՛չ միայն իր կազմակերպութեան՝ ԱՍԱԼԱ-ին, այլեւ՝ իրաւազուրկ բայց եւ պահանջատէր համայն հայութեան:
Բոլորիս պարտքն է հաւատարիմ մնալ իր կեանքը Հայաստանին եւ Հայութեան բագինին զոհած այս քաջորդւոյն ԿՏԱԿ-ին...
Արդարեւ, մեկնելէ առաջ անձնասպանական իր առաքելութեան՝ հերոս Լեւոն Էքմէքճեանը ԱՍԱԼԱ-էն եւ անոր հիմնադիր-ղեկավար՝ նահատակ Յակոբ Յակոբեանէն խնդրած էր, որ ապագային իր մարմինը յանձնեն իր սիրեցեալ Կիլիկիոյ հայրենի Ատանայի հողին:
Մեր հերոսին եւ հերոսներուն մարմինները իրենց հանգիստը կրնան գտնել միա՛յն հայրենի բռնագրաւեալ հողերու տարածքին կամ... Ծիծեռնակաբերդի Նահատակաց յուշարձանի շուքին տակ:
